Damals bin i demonstriern gangen für die Schwarzen . . . für die Hahnenschwanzler . . . net? Hab i 5 Schilling kriagt . . . Dann bin i ummi zu de Nazi . . . da hab i a 5 Schilling kriagt . . . na ja, Österreich war immer unpolitisch . . . i man, mir san ja kane politischen Menschen . . . aber a bissl a Geld is z'samkummen, net?
Damals bin i politisiern gangen für die Blauen . . . für die Haiderschwanzler . . . net? Bin i Finanzminister worn . . . Dann bin i umi zu de Schwarzen . . . zu de Hahnenschwanzler . . . da bin i a Finanzminister worn . . . na ja, Österreich war immer unpolitisch . . . i mein, wir san ja keine politischen Menschen . . . aber a bissl a Geld is z'samkummen, net?
I hab ja nie Kinder wollen. I hätt's ja haben können . . . Aber die Verantwortung? I bin a verantwortlicher Mensch . . . bei solche Zeiten! I maan . . . der Schilling hat scho an Wert g'habt . . . aber er war net zum derwischen. Man hat sich ja bemüht, de ganzen Kanzler . . . wia s' da warn . . . der Seip . . . der Bur . . . der Scho . . . is ja wurscht. Aber bein Heirigen - da hat's Persönlichkeiten gebn! Petzner-Masl, Woitschkerlbuam, Korschinek-Vickerl, Nezwerka-Pepi. Is Ihna des a Begriff? Ah naa - Se san ja jung. Sie wissen ja nicht, was Heiterkeit war, echte Fröhlichkeit. So a Hetz wie damals hamma nie mehr g'habt! . . . in Prater . . . an der Donau . . . mit de Madln . . . bein Wasser.
I hab ja nie Kanzler sein wollen. I hätt's ja sein können . . . Aber die Verantwortung? I bin a verantwortlicher Mensch . . . bei solchen Zeiten! I mein . . . der Euro hat schon an Wert g'habt . . . aber er war net zum derwischen. Man hat sich ja bemüht, de ganzen Kanzler . . . wie s' da warn . . . der Schü . . . der Gus . . . der Fay . . . is ja wurscht. Aber beim Fabios - da hat's Persönlichkeiten geben! Petzner-Witwerl, Scheucherl-Buam, Elsner-Helmerl, Berlin-Dillo, Bakschisch-Hocheggerl, Mensdorff-Burli, Sechzehner-Plech-Ernstl, Netzwerker-Meischi. Is Ihnen das ein Begriff? Ah naa - Sie san ja jung. Sie wissen ja nicht, was New Economy war, echte Goldgräberstimmung. So a Hetz wie damals hamma nie mehr g'habt! . . . bei der Homepage . . . mit der Telekom . . . bei die Eurofighter . . . bei der Buwog . . . bei der Hypo.
Am Sunntag san ma manchesmal ins Piestingtal g'fahrn - sie hat durt so a Siedlungshäuserl geerbt g'habt von ihre Eltern . . . da san ma g'sessen . . . ham in Regn aussig'schaut . . . und ham uns denkt: andere Leite haben das nicht.
Am Sonntag san ma manchesmal nach Capri g'flogn - sie hat dort so a Siedlungshäuserl geerbt g'habt von der Schwiemu . . . da san ma g'sessen . . . ham in d'Sun aussig'schaut . . . und ham uns denkt: andere Leute haben das nicht.
